ГЕН ЛОКУСЫ. Хромосомада не хромосома картасында геннің оқшауланған орны. Аллельді гендер бірдей локуске орналасады. Ген локусы физиологиялық хромосоманың құрылысына, әрекетіне белгілі генетикалық әсерін тигізеді. Локустағы өзгерістер әр түрлі аллельдердің пайда болуына себепкер болады. Ген локустарын генетикалық және цитологиялық әдістермен анықтайды. Бір түрге немесе бірнеше түрге жататын организмдерде биологиялық, физиологиялық процестердің өтуін қамтамасыз ететін не ықпалын тигізетін бірдей ген локустарын гомологиялы локустар деп атайды. Бірімен-бірі тығыз тіркескен көптеген гендерден тұратын күрделі локустар да кездеседі. Белгінің дамуына әсері бар гендер - тізбекті локустар не тізбекті реакциялы локустар деп аталады. Ген локусы термині 1915 жылдан қолданыла бастады.

Әдеб.: Қазақ совет энциклопедиясы. -Алматы, 1975 ж. -Т.1. -С.63.