ГЕНОТИП (ген және тип) - хромосомадағы барлық геннің жиынтығы. Генотип терминін 1909 жылы дат биологы В. Иогансен ұсынған. Генотипте ұрпақтан-ұрпаққа тұқым қуу туралы хабар болады. Генотип болашақ организмнің дамуында, құрылысында, тіршілігінде, әрекетінде, былайша айтқанда, барлық белгілерінде, қасиеттерінде, яғни фенотипінде көрінеді. Генотип - өзара байланысты бірнеше ген жүйесі, сондықтан бір геннің әрекеті өзін қоршаған генетикалық ортаға байланысты. Мыс., жұпар бұршақтың кейбір сорттары мен гүлінің қызыл түсті болуы генотипте екі түрлі генотипінің басымдылық аллельдерінің қатысуына байланысты, ал бұл аллельдер жеке күйінде гүлдің ақ түсті болуына әсерін тигізеді. Генотипінің сыртқы және ішкі орта жағдайларымен байланыстылығы организмнің фенотиптік белгілерін дамытады. Генотип терминін кейде ген жиынтығын немесе жеке бір генді бақылаған жағдайда да қолданады.

Әдеб.: Қазақ совет энциклопедиясы. -Алматы, 1975 ж. -Т.1. -С.63.