ҚҰЙРЫҚ-БАУЫР: ДАЙЫНДАУ ТӘСІЛІ

Категориясы: Тағам

Қойдың құйрық майы мен бауыры салқын сумен жуылып, тазартылады. Содан соң қазанға су құйылып, отқа қойылады. Су шым–шым қызған кезде қазанға құйрық май салынып қайнатылады. 15 минуттай қайнағаннан кейін бауыр, тұз, бұрыш, сарымсақ салынады да қазанның қақпағы жабылып, құйрық пен бауыр әбден піскенше одан әрі қайната беріледі. Піскеннен кейін құйрық бір бөлек, бауыр бір бөлек ыдысқа түсіріп алынып, суытылады. Өйткені тоңазыған құйрық та, бауыр да тез әрі оңай кесіледі. 
Құйрық та, бауыр да жұқа әрі үш бұрыштап қиялап кесіледі. Дастарқанға жайпақ ыдысқа салынып әкелінеді. Ол үшін бір тілім бауырдың үстіне бір тілім құйрық салынады. Әсемдік үшін бетіне көк жуа, аскөк себуге болады. 
Құрамы: 600 грамм бауыр, 200 грамм құйрық май, 1 түйір көк жуа, бір шай қасық аскөк, бір бадана сарымсақ, асуға арналған су құйрық пен бауыр еркін батып жататындай, ал тұз бен бұрыш татымына қарай.

  Жарияланған-2016-05-27 13:50:20     Қаралды-11154