КҮЛКІМЕН ДЕ КІСІ ӨЛТІРУГЕ БОЛАДЫ (КАРИКАТУРА)

Puck американдық журналында Николай ІІ арналған карикатура. 1905 ж. 

«Күлкімен де кісі өлтіруге болады», - дейді француздар.

Жеке бір адамның, не белгілі бір топтың жағымсыз мінезін келеке қылу - карикатураның мақсаты.

Сатиралық та, юмористикалық та карикатуралар бола береді.

Сатирик суретші адамдардың қоғамға зиянын тигізетін кеселді кемшіліктерін ыза-кекпен жирене отырып әшкерелейді.

Ал, енді кейбір адамдардың жекелеген мінін зілсіз әжуа ету юмористикалық карикатураға жатады.

Карикатура өнері бұдан бірнеше ғасыр бұрыннан бері белгілі. Ежелгі мысырлықтардың мынау «Қаз баққан мысық» деген карикатурасына қараңыздаршы. Ол саз тақташаға сызып салынған.

Ежелгі Мысыр карикатурасы. "Қаз қорыған мысық"

Қоғамды дүр сілкіндіретін революциялық оқиғалар тұсында карикатура өнері айырықша етек алады. Карикатурашы қаламының бар зәрін корольдер мен чиновниктердің, дін иелерінің басына төгіп бағады. Зорлық пен зұлымдыққа қарсы шыққан карикатурашылардың өнері халыққа қашан да түсінікті болған.

В.А.Серовтың Николай ІІ арналған карикатура. 1905 ж.

Россияда 1905 жылғы революция тұсында сатиралық журналдар өте көбейіп кетті. Оларға М. А. Врубель, Б.М.Кустодиев, В.А.Серов сынды әйгілі суретшілер белсене араласты.

Бір адамның карикатуралық портреті шарж деп аталады. Онда әлгі адамның мінезін ашып беретін белгілі бір сипаты әдейі әсіреленіп суреттеледі. Газеттер мен журнал беттерінен «Достық әзіл» деп аталатын күлкілі суреттерді көресіздер. Ондай суреттер ешкімнің шамына тимейді, қайта зілсіз әжуасымен көңілді көтереді.